Библиотека

Бүген "Минем Бәзәкәм" сайтының актив волонтеры, авылыбызның һәм туган төбәге Әгерҗе якларының чын патриоты Фәния Зиннәт кызы Башарованың туган көне. Фәния ханым үзенең тынгысыз йөрәге, тырыш иҗади хезмәте белән районыбызда һәм Татарстанда төрле бәйгеләрдә җиңеп, авылыбызның данын еракларга тарата. Шуның белән бер рәттә ул авылның яшьләре белән дә, өлкәннәре белән дә күп төрле даими эшләр алып бара. Ул оештырган "Хәят" группасы СВОга булышуда да, төрле культура чаралары оештыруда да әйдәп баручы. Рәхмәт Сезгә изге гамәлләрегез өчен, Фәния ханым! Сезгә алдагы тормышыгызда ныклы сәламәтлек, бәхет һәм шатлык тулы гаиләгез, балаларыгыз белән бергә озын гомер телибез! Сезнең илһам чишмәсе беркайчан да саекмасын, энергиягез гел ташып торсын!

Рәхмәтлемен сиңа, Бондюг ягы

Бәзәкә китапханәсендә 2017 нче елдан башлап өлкәннәр өчен «Хәят» аралашу түгәрәге эшләп килә, монда аена 2 тапкыр төрле темага чаралар, очрашулар үткәрелә. Ямьле язда хәятлеләр Бәзәкәдә Менделеевск Татар китапханәсенең «Ядкарь» әдәби-иҗади клубын кабул иткән булсалар, серле көздә хәятлеләрне ядкарьчеләр кунакка дәштеләр.

«Ядкарь» әдәби-иҗади клубы җитәкчесе китапханәче Гөлназ Хафизова очрашуга зур программа әзерләгән иде: катнашучылар «Геройлар аллеясы»нда , Чернобыль АЭСындагы авария ликвидаторларына һәм интернационалист сугышчыларга багышланган мемориалда булдылар, шәһит киткәннәр рухына дога кылып чәчәкләр салдылар. Гөлназ Рафкиловна истәлекле урыннарның тарихы турында сөйләп, таныштырып барды. Кунакларны шәһәрдә узган көз генә ачылган «Атмосфера» күргәзмәләр үзәгендә Разия Биктимерова үзе каршы алды һәм кул эшләре, картиналар күргәзмәсе белән таныштырды.

Очрашу Татар китапханәсендә «Рәхмәтлемен сиңа, Бондюг ягы» дигән тема астында дәвам итте. Ядкарьчеләр Гөлниса Евдокимова, Фәридә Гәрәева, Венера Миназова, җирле шагыйрә Диләрә Хуҗина үзләренең шигъри җыентыклары белән таныштырдылар, шигырьләрен укыдылар, иҗатка этәргеч биргән серләре белән уртаклаштылар, илһам биргән, үрнәк алган күренекле затларны искә алдылар. Ядкарьчеләрнең иҗаты дәрәҗәле әдәби-нәфис, иҗтимагый «Мәйдан» журналында урын алган булуы да аларның осталыкларын күрсәтә.

Бәзәкәлеләр арасыннан 5 китап авторы Рәмзия Мөхетдинова чыгыш ясады, хезмәтләре белән таныштырды. Әле иҗат юлына беренче адымнарын гына ясаган Фәймә Галимова, Рәмзия Туктаманова шигырьләрен укыдылар.

Гамьле әңгәмә китапханәнең уку залында әзерләнгән түгәрәк мул өстәл артында күңелле аралашу, җыр-моң белән дәвам итте.

Хәятлеләр әлеге очрашудан киң мәгълүмат , җаннарына рухый азык алып рәхмәтле булып кайттылар.

М.Җәлил тормышы һәм иҗаты

Бәзәкә авыл китапханәсендә урта мәктәп белән берлектә (директоры Л.С Шакиров) 8-9 сыйныф укучылары өчен татар шагыйре, Ленин премиясе лауреаты, Ватан азатлыгы һәм бәйсезлеге өчен гомерен биргән Советлар Союзы Герое М. Җәлил тормышына һәм иҗатына багышланган «М.Җәлил. Тормышы һәм иҗаты»дигән темага интеллектуаль уен үткәрелде.

Уенда 8нче һәм 9 нчы сыйныф укучылары катнаштылар. Укучылар ике командага бүленеп, үткәннән бүгенгегә параллель үткәрделәр -танылган шагыйрь тормышының кызыклы мизгелләрен искә төшерделәр, иҗатының зур өлешен алып торган Бөек Ватан сугышы темасы буенча сорауларга җавап эзләделәр. Программа берничә раундта үтте, һәр этап билгеле бер темага багышланды. Чара җанлы шартларда узды, балалар белемнәрен күрсәттеләр һәм беррәттән үзләре өчен күп яңалыклар ачтылар. Дөрес җаваплар өчен командалар баллар җыйдылар.

Уен ахырында Бәзәкә урта мәктәбе укытучысы Закирова Г.Ш. уенга йомгак ясады. Күбрәк баллар җыеп, «Красные ромашки»командасы җиңүче булды. Әлеге чара «Пушкин картасы» буенча үткәрелде.

Ф.Башарова

Мәрхәмәтлелек йөрәктә яши

1 нче октябрь – Өлкәннәр көне белән, илебездә изгелек һәм ихтирам атналыгы башланып китте. Бу көнне без өлкәннәрне котлыйбыз, аларның гомер буе башкарган хезмәтләре өчен рәхмәт белдереп хөрмәт күрсәтәбез.

Ә менә Бәзәкә авылы китапханәсенең өлкән яшьтәге актив укучылары бу атнада, илебез өчен авыр көннәрдә, МХОга ярдәм йөзеннән мәрхәмәтлелек акциясе үткәрик дигән башлангыч белән чыктылар, ватниклар һәм салфеткалар әзерләргә тәкъдим иттеләр.

Авылның беренче көнне җыелган иң ярдәмчел һәм мәрхәмәтле хатын-кызлары Өлкәннәр көнендә аеруча тырышып эшләделәр, 100 салфетка һәм 100 дән артык ватник әзерләделәр. Аллаһның рәхмәтләре яусын сезгә, өлкәннәребез, аяк-кулларыгыз сызлаусыз булсын.

Атна буе дәвам итәчәк әлеге акция көннәрендә китапханә иртәнге 9.00 сәгатьтән эшләячәк. Читтә калмагыз, авылдашлар, безгә кушылыгыз.

Ф.З.Башарова

Сезгә карата хөрмәт һәм ярату белән...

Урамда көз хакимлек итә, аның да иң матур вакыты - әбиләр чуагы. Алтын көздә без көтеп алган иң матур бәйрәм - Өлкәннәр көне, шәфкатьлелек һәм хөрмәт атналыгы билгеләп үтелә. Әлбәттә, бу бәйрәмнең елның шушы чорында үткәрелүенең үзенә күрә бер сере дә бар: айлар буе чәчәк – гөлләргә күмелеп, җәй җылысында хозурланган көннәр үтеп , алар урынына тулышып пешкән җиләк-җимешләре, өлгергән икмәге, амбар тулы нигъмәтләре белән көз килде. Нәкъ кеше гомере кебек: аның да яшәреп-яшьнәп йөргән вакытларын акыл җыеп, бай яшәү тәҗрибәсе туплаган еллары алыштыра бит.
4 октябрь көнне Бәзәкә авылы китапханәсе мәдәният йорты белән берлектә өлкәннәргә бәйрәм уңаеннан концерт программасы тәкъдим итте.

Хөрмәт һәм ярату белән кичәдә өлкәннәрне Бәзәкә авыл җирлеге башлыгы И.И.Кашафутдинов, мәдәният хезмәткәрләре ихлас котладылар, гомер буе куйган хезмәтләре, бүгенге көндә дә МХОга күрсәткән ярдәмнәре өчен рәхмәт белдерделәр, изге теләкләрен җиткерделәр.

Хөрмәт һәм ярату белән өлкәннәргә Бәзәкә мәдәният йорты үзешчәннәре А.Нәбиева, М.Костина, Л.Сипатова, Р.Дождикова , мәктәп укучылары матур җырларын, Бәзәкә мәдәният йортының “Ялкын” балалар бию ансамбле биюләрен бүләк иттеләр. Авылдашларыбыз Ф.Галимова, Р.Туктаманова эчтәлекле шигырьләр укыдылар. Бәйрәмдә катнашучылар Р.Гатауллинның тальян гармунына кушылык яшьлек җырларын башкардылар. Бәйрәм кайнар чәй табыны янында дәвам итте.

Кичәне алып барды китапханәче Ф.Башарова.

Ф.Башарова

Мәрхәмәтлелек йөрәктә яши

1-7 октябрь көннәрендә Бәзәкә авылы китапханәсенең көмеш волонтерлары «Мәрхәмәтлелек йөрәктә яши» дигән патриотик акциядә катнаштылар. Шушы көннәр эчендә ярдәмчел һәм мәрхәмәтле авылдашларыбыз Фәймә Галимова, Ильһамия Шакирова, Рәүфә Хөрмәтуллина, Әкълимә Закирова, Гөлфания Калимуллина, Мәсгүдә Плотникова, Гүзәл Салимова, Розалия Таһирова, Рәшидә Салихова, Рәмзия Туктаманова, Вәсилә Гараева, Фәния Башарованың кайгыртучан куллары белән госпитальләр өчен 358 данә ватник, 350 данә салфетка әзерләнде. Чын күңелдән башкарылган эшләр һичшиксез батыр егетләрнең гомерен саклап калырга ярдәм итәр дип ышанабыз. Хезмәтегез өчен зур рәхмәт, авылдашлар. Моннан соң да бергә калыйк, Җиңү көненә бергә атлыйк!

Ф.Башарова

Яраткан шөгыль җанга дәва

Бәзәкә китапханәсе каршында эшләп килүче «Хәят» түгәрәге өлкәннәре бакчадагы көзге эшләрне тәмамлаганнан соң яңадан бергә җыелдылар. «Яраткан шөгыль җанга дәва» дип исемләнгән чираттагы утырыш хәятлеләрнең мавыгуларына багышланган иде.

Мавыгуларыннан тәм тапкан, ләззәт алган хәятлеләр рәхәтләнеп шөгыльләре турында - чигү, бәйләү, пешерү, чәчәк үстерү, дәвалау үләннәре җыю турында сөйләделәр, тәҗрибәләре белән уртаклаштылар, хәтта үзләре генә белгән серләре белән дә бүлештеләр. Гомумән, хатын-кыз күңеле яткан хезмәт башкарганда, иҗат иткәндә, ул үзен-үзе эчке гармониядә тоя. Фикернең иҗади очышы яхшы кәеф тудыра һәм ул аны чолгап алган бөтен нәрсәгә дә күчә. Шулай итеп, хатын-кыз дөньяны матуррак итә.

Чараның икенче өлешен хәятлеләр кайнар чәй өстәле артында үткәрделәр. Өлкәннәр декадасы буларак, китапханәче өлкәннәрне бәйрәм белән котлады, 10 сәламәт яшәү кагыйдәсе белән таныштырды, сәламәт яшәү рәвеше турындагы әдәбият белән таныштырды.

Шигырь телендә сер сөйли җилләр

“Кешенең кайткан җире бер генә була. Киткән җире генә күп була кешенең”

(Т.Миңнуллин)

Бер төркем бәзәкәлеләр 2024 елның апрель аенда Алабуга шәһәренең А.Пушкин исемендәге китапханәдә “Шибаев укуларында” катнашып, авылдашыбыз Равил Шибаевның иҗаты белән танышып, аны котлап кайткан идек. Инде менә тагын бер сөенечле яңалык җиткерәбез. “Мәйдан” әдәби-нәфис, иҗтимагый журналының 10 нчы санында Р.Шибаевның шигырьләре дөнья күрде! Әнисенә, мәхәббәт темасына багышланган, авторның күңел халәтен яктырткан шигырьләре “Илһам канатларында” рубрикасында урын алган. Күңелендә шигырь уты янган сәләтле авылдашыбызны иҗаттагы уңышы белән чын күңелдән котлыйбыз! Һәм, әлбәттә, горурланабыз! Бәзәкәне иҗаты белән бөтен республикага таныткан шагыйрь Марсель Гыймазетдиновның дәвамчылары булуына сөенәбез! Кайда гына яшәсәләр дә, иҗат итсәләр дә, исемнәре Бәзәкәлеләр булып кайта бит!

Киләчәктә дә уңышлар юлдаш булсын сезгә, Равил Фәйзи улы!

Ф.Башарова

Өйле булу – көйле булу

Гаилә - безнең һәрберебез өчен иң мөһиме. Анда безнең өчен иң якын һәм газиз кешеләр яши. Без аларны яратабыз, аларга бәхет һәм яхшылык телибез. Һәм нәкъ менә гаиләдә без җаваплылыкка, кайгыртырга һәм хөрмәт итәргә өйрәнәбез.

Бәзәкә авыл китапханәсендә өлкәннәр өчен эшләп килүче «Хәят» түгәрәгенең чираттагы утырышы - « Өйле булу – көйле булу» дигән темага әңгәмә, гаиләгә багышланды.

Өлкәннәр үзләренең кабатланмас яшьлекләрен искә алып балаларын үстергән елларны искә алдылар, буыннан-буынга күчеп килгән гореф-гадәтләр - яучылык, никах, килен төшерү, өй киендерү, балага исем кушу, бәби чәе һ.б., гаилә бәйрәмнәрен һәм милли бәйрәмнәр - туган көннәр, карга боткасы, сабантуй турында сөйләштеләр. Үзләре алып килгән һәм «Тату гаилә – оҗмах түре» дип исемләнгән күргәзмәдә урын алган фотоларның тарихларын сөйләделәр, күңелләрендә уелып калган вакыйгалар белән бергә якыннарын һәм күршеләрен искә алдылар, «Гаилә – бәхет ачкычы» дигән видеоязма карадылар. Китапханәче темага кагылышлы күргәзмәдәге әдәбият белән таныштырды, Р.Насыйбуллинның «Гаиләгә мәдхия» поэмасын укыды.

Күңелле аралашу кайнар чәй табыны янында дәвам итте.

Ф.Башарова

Курить не модно, дыши свободно

Международный день отказа от курения ежегодно отмечается в третий четверг ноября. В 2024 году он приходится на 21 ноября. Его главной целью является привлечение внимания общественности к негативным последствиям курения табака.

В Международный дня отказа от курения библиотекарь Бизякинской сельской библиотеки совместно с Бизякинским СОШ провели акцию «Курить не модно, дыши свободно», направленную на профилактику вредных привычек и популяризацию здорового образа жизни.

Дети узнали о вреде курения сигарет, о том, что курение – одна из самых значительных угроз здоровью человека, о вредных и опасных для жизни веществах, которые входят в состав сигарет, о болезнях, возникающих вследствие продолжительного курения.

В заключение мероприятия сотрудник библиотеки пожелала ребятам не попадать в пожизненную зависимость к вредным привычкам.

Фото

Волонтер-ул яшәү рәвеше

Җырлы-моңлы очар кошыбыз

Адрес: 423648, Республика Татарстан, Менделеевский район, с. Бизяки. Самое родное село в мире.
Расположение села: правый берег р. Кама, до Набережных Челнов-37км, до Казани-250км, до Ижевска-160км